لطوف السحلية

حياكم·· تعرفون ''امونة'' ربيعتي اللي خبرتكم عنها·· هي هي الأرملة -اللي بغت تاخذ فيللا في ''جزيرة الريم'' وتدفع أقساطها من بيزات الشؤون- يالسة تزهب حق بنتها ''عوشة'' تراها مالجة من ست شهور، لكن الأخبار ما تنبأ بالخير· لا لا لا تحاتون، بتعرس البنية، الأخبار السيئة الواردة تفيد أن ''عوشة'' بتعرس قبل الموعد المحدد، وبعدها ما خلصت زهبتها· أصبروا بخبركم سالفتها، لكن قبل خلوني أخبركم عن ''سلامة'' بنت صويلح، تراها لحين ما ردت بيزاتي، وديونها طافت الخط الأحمر، أمها ''فطوم'' طلبت مني أسوي لها إعادة جدولة، ووافقت آخذ بيزاتي بالاقساط، لكن عقب غيرت رايها، وقالت بتسوي جمعية وبتعطيني··· الله يصبرني عليها وعلى ريَلها· أحين بخبركم عن ''عوشة'' بنت ''أمونة''، عاد هاي البنية وحليلها صغيرة ويتيمة، توها مخلصة ثانوية، اخوها العود معرس من ثلاث سنين، وزوجته ''لطّوف'' شرية عوووودة، وحليلها ''امونة'' ما تستاهل هالكنّة، بس هذا حظها؛ عاد هالسحلية ''لطوف'' تغار من ''عوشة'' يوم تتزهب حق العرس، وتغار أكثر يوم خطيب ''عوشة'' يزورهم في البيت، وتتم تناحس عليهم، ما تهنيهم على قعدة، وكله تشرج ريلها على ''عوشة''· عن ابو··· تقولون مرت أبوها· آخر نحاسة هالسحلية، أونّة ما تبغي ''عوشة'' ترمس ويا ريلها في التليفون، تقول ما يصير، عيب؛ وتقول إشحقّه هي ما رمست ريلها قبل ما تاخذه، والمصيبة الأكبر إنها كذبت وقالت إن ''عوشة'' طلعت مع ريلها بالخَشة، عاد هني قامت الدنيا على ''امونة'' وبنتها، وحلف زوج ''لطوف'' يسوي العرس الأسبوع الجاي· المشكلة البنية ما خلصت زهبتها، وحتى بيتهم ما جهز، والريال دافع عرابين حق الصالة والفرقة والمقهويات، وهالناس مرتبطين بمواعيد ثانية، حتى الصالون مب فاضي، يعني العرابين بتروح عليهم، وحليلج يا ''أمونة''، عاد هالمرة صحن ''اللقيمات'' ما بيخفف حزنها·· حسبي الله عليج يا ''لطوف''· ام صويلح