قرض على المكشوف

الحياة مسرح كبير مليء بالأحداث، منها ماهو مضحك، ومنها ماهو مُبك، ثلاثة مشاهد لا تختزل كل مشاهد الحياة، فبلا شك هنالك وجوه أخرى للحياة مُشرقة وأكثر جمالا مما رصدت في ''شخبوطتي'' هذه، فتصوير ونقل الحدث، كما حدث، أمانة ومسؤولية وإن حملت في طياتها الدمعة والألم معا !!! المشهد الأول، ''عروس الغالي'': مكالمة هاتفية بين أم خلفان وولدها أثناء وجودها في محل للعناية بالأظافر وتقول: ''يا بويه يا خلفان ودْر عنك السوالف واسمع كلامي زين وطيع الشور إللي ما عقبه شور، غير بنت عمك قمْوش ما بتاخذ، الحين عمك استواله شهر من يوم مات، بنسير ونخطبها حقك يوم الجمعة، عن لا يسير حد قبلك ويطلبها من أمها، تدري هي لا أخت ولا أخ عندها، وأبوها ذاخرلها المال والحلال كله، خل عنك خريط ومريط اليهال، وسوالف الحب والغرام، شغل الأفلام اللي ما فيه خير ولا فايدة، وهي صدق خِسْفه وما اتقابل وما تعرف ترمس، وعيونها عيون صينية، والعام الأول نقع فيها صخّان الحمْام واحترقت، وساروبها بلجيكا وما خلوا مكان يرقعون ينبها ويعدلونها، بس شو بتسوي فديتك، اتحمْل وتعال على عمرك شوي، وبتكسب الأجر فبنت عمك!··· وعقب عاد لابغيت برايك خذ على هواك، ما شيّ مشكلة الغالي· زين أبويه لا خليت منك، سْر أحينه بيتهم، و طالع جان يبون شي وله غيره سَوْه حقهم، ف مان الله فديتك'' !!!· ؟؟ تعليق : حليلهم مسااااكييين !· المشهد الثاني: ''درس خصوصي'' حوار خارج التغطية بين وحدة وربيعتها، تواسيها وتنصحها، قالتلها: حق شو تصيحين عليه هالسبال ؟!، كم نصحتج وإنتي ما تبين لا تسمعين ولا تفهمين، بويه جنس الرياييل ما يتأمْن، إسأليني أنا عنهم، تزوجت أربع مرات وتطلقت مب من شي هيّن!!!، وإنتي الله يهديج بعد غير شكل، خلْج طبيعية شوي، لا تندمجين وايد فالدور، إنتي عاطفية وااايد، ورومانسية وصادقة أكثر عن اللازم، وهذا غلط، هاااا، شفتي شو صار ألحينه؟، كان يرْمْسج ويرْمْس ربيعتج فوقت واحد، مع إنها ما تتشاهد ولا تعرف تلبس ولا تعرف تتكلم أم ثْمْ محيوس الدْبْه، ولا تعرف السنع كيف قايل، وطالعي خذها وودْرج إنتي هالخمام إللي ما يستحي، شو تبينه هالحافي المنْتف؟!، لا وطلع ''بدون'' بعد، خليه يولي ولا تفتكرين فيه، إنسيه وشوفي إللي عقبه، شو تبين تذبحين عمرج عليه مسَوْد الويه؟، إنتي ظفرج برقبته، بس إنتي مستهينه بعمرج، خبله ما تعرفين تتصرفين ولا تعرفين اتدبرين أمورج زين مثل الناس، شوفي كيف البنات يخططن و يرسمن مب شراتج إنتي يالستليّ تبيعين أخلاق ومبادي من اسنين!، ويا ليت حصْلتي شي من وراهن، ما غير الشقى والعثره! ، حبيبتي ، إنتي لو في راسج مخ ، ترسمين على أربع خمس في وقت واحد، ولا بد ما يصيب الحظ مع واحد منهم، أما إتمْين رابطه عمرج ومصيرج ابواحد بس لأ ؟! ، إسمحيلي أقولج إنج خبله وما تفهمين الحياة كيف ماشية ألحين، وبعدين رياييل هالوقت يحبون شغل الصبغ والتمثيل، يابنتي هُمْ أصلا يحبون إللي يقص ويضحك عليهم، شو فيج ما تشوفين بعينج ؟!، وكل واحد يلعب بطريقته، المهم يوصل للي يباه و بأقل الخساير، وإن خابت مع واحد أكيد بتصيب مع غيره، فهمتي ؟!!!· ؟ تعليــــــق : خيبه خيبـــــه خيبــــــه شو هذا ؟!!!· المشهد الثالث: ''ليش هو مو أنا ؟!'' حوار هاتفي، زميل مع زميل، واحد يقول للثاني ''قريت قرار التعميم مال المدير العام؟، بالله عليك جسْوم بو الصخّام هذا السبال إللي ما يعرف اليَسْ من النْو، يرْقونا ويستوي وكيل مساعد علينا ليش ؟، وأنا قبله بسبع سنين ما يرْقوني، صدق الحظ للشلقة والبلقة، أنا أبا أعرف كيف قدر يوصل في أقل من خمس سنين هاااا، أكيد مسوي اطبوب وسُويّات حق المدير، وله كيف يطير ويصير بهالسرعة؟، مب طبيعي إللي يالس يصير في دايرتنا، هذا ظلم و لا بعدل، أنا أولى منه فالمنصب، وخير ياطير عنده ماجستير وله حتى دكتوراه، أنا باجر أقدر أييب عشر شهادات مثلهن ما يغلبني شي، بس أنا ما أحب شغل الحفر ومسح الجوخ و شغل النفاق، أنا ريّال أخاف ربي وأخاف على هلي واعيالي، ولو أبغي جان من زمان إستويت مدير عام، بس أنا ما أنْزل نفسي لهذا المستوى !!!، إنت تدري إنه جسْوم عنده أخو مسجون؟، ما خذ قرض من البنك بثنين مليون؟، وأمه تبات اتصيح عليه الليل والنهار، رمسْني أبوه أول أمس عسب أكلمله حد من الربع يشل أوراقه ويظهرونه من السجن قبل ارمضان، الله يستر علينا، شو تباني أسوي ؟، ويهي مب حديده، بعد أستحي حد ينصاني في حايه و أرْده، و يقولك سَو خير وعقه بحر، إسمحلي بو أحمد صدعتلك راسك، يالله أشوفك باجر فالدوام، سلم على الأهل كلهم، مع السلامه !!!· ؟ تعليق : يباله تعليق !· ؟ همسه: ''النفوس المظلمة لا تُضيء في العتمه'' !!!· f_a0006@yahoo.com