16 ديسمبر 2009 01:01
فطوم: شو بعد بتسويين اليوم،، مرقوقة اسبانية؟
بي بي: لا.. ماما يقول،، سوي معكرونة ودجاج.
فطوم: معكرونة!!! ليييييش؟ ماشي عيش؟!!
بي بي: شي وايد عيش،، بس ماما ما يريد.
فطوم: هي ما تبي، نحن نبي. وبعدن من متى نتغدى معكرونة! سوي بسرعة سوي مجبوس دجاج.
بي بي: اي شي تقوله ماما عودة انا يسوي،، انا ما يسوي تغيير.
فطوم: يالمصلحجية،، كل هذا عشان ودتج وياها أمس مباراة بطل قارتكم الصفراء.
بي بي: ماما إنتي يسوي كلام مافي زين،، انا من كلكتا،، ما يسوي تشجيع أي مكان تاني،، بس فريق “موهون باقان”.
فطوم: تشجعين “باجوان”؟ شو بعد ها؟
بي بي: موهون باقان” هذا اقوى فريق في الهند، تعرفين هذا فريق يشارك في كأس العالم سنة 1950.
فطوم: وفزتم؟!!
بي بي: لاااا،، كل الفريق ما يقدر يلعب،، نزل الملعب “حافي” مافي جوتي رياضة.
فطوم: وحليلكم،، زين بعد ما ييتو تلعبون فبوظبي. مطر احين،، كيف بتلعبون حفي؟!
بي بي: لو يجي هذا فريق يلعب هني،، ما يحصل مكان واحد فاضي داخل ملعب،، انتي شو يقول،، هازا “نوهون باقان”.
فطوم: عيل انتي امس في مباراة الكوريين والارجنتينيين،، ما شجعتي فريق قارتج،، عيل شجعتي منو؟
بي بي: أنا ما يسوي تشجيع؟
فطوم: وأم صويلح عادي،، ما ضاربتج؟
بي بي: عادي،، بس يقول لما يلعب برشلونة انا لازم يسوي شوي تشجيع.
فطوم: اهااا،، عيل ابتزتج العيوز. والحين خبريني،، صج صج،، شو سالفة المعكرونة؟
بي بي: هذا فريق برشلونة بس ياكل معكرونة، دجاج، موز. وماما عودة تريد نفس الشي.
فطوم: غربلتنا هالحرمة،، وين سايرة هالعيوز،، كل شي رازه عمرها فيه، حتى أكل الفرق.
“تدخل أم صويح فجأة”
أم صويلح: فطوم،، خاطري أشوفج مرة ما تتحرطمين،، عافانا الله.
فطوم: انتي اللي يعيش وياج، يستوي صاحي؟
أم صويلح: أخيرا اعترفتي انج مب صاحية!
فطوم: بسبتج!
أم صويلح: مب مهم السبب،، الأهم النتيجة.
om.sweleh@gmail.com