سمبوسة وكرك

سلامة: قوليلي يدووه،، بنفوز اليوم؟ أم صويلح: العلم عند ربي،، لكن في شي واحد اقدر أقوله. سلامة: قولي،، كلي آذان صاغية. أم صويلح: منتخبنا مستواه متطور وايد عن قبل،، وهالبطولة مستعدين لها من زماااان،، وشيوخنا ما قصرو،، كل شي موفرينه،، عقب هالقول،، مالنا قول. سلامة: تخيلي يدوووه ناخذ كآس آسيا،، واااو،، أحس بيغمى علي من الفرحة. أم صويلح: بتستوين مثل بي بي،، امس أغمى عليها عقب خسارة منتخبها،، وجلبت المكان فوق تحت،، وتمو ربيعاتها يصيحون عليها،، سوولي فيلم هندي صدق. سلامة: كان خاطري وايد اشوف المباراه وياهم أمس،، استانسو ربيعاتها بالتلفزيون والجسلة؟! أم صويلح: هي وحليلهم،، وتموو ياكلون هالسمبوسة والباكورة،، ويشربون هالكرك،، وكل ما يابو فيهم الاستراليين جول،، علو الريس مالهم،، لين خسرو المباراة. سلامة: وبي بي،، شو سوت؟! أم صويلح: شو بتسوي بعد،، هاي صدق خبلة،، تصدقين تمت عشر دقايق كاملة من المباراة تتحرى الهند لابسين البرتقالي والأخضر،، تقول هاي ألوان علمهم ومب راضية تقتنع. سلامة: وعقب!! أم صويلح: تمت جيه لين يابت استراليا جول،، ويوم اشتطت،، فهمناها إن الجول فيهم،، وإن الهنود لابسين أزرق والاستراليين لابسين ألوان العلم الهندي برتقالي وأخضر. سلامة: ههاهههااااي. أم صويلح: صخي صخي كاهي يايه،، لا تتحرانا نطنز عليها. (تدخل بي بي) بي بي: ماما،، متي يسوي ترتيب مال عشى اليوم؟ أم صويلح: جهزي للفاله أحين،، وعقب الغدى حضري للعشا. سلامة: شحالج بي بي؟ بي بي: كل يوم أنا موجودة ما يقول كيف حالك،، ليش أحين يسأل عن حالي؟ سلامة: ول ول ول،، هاي مولعة،، شو بلاج،، أنا قصدي اتطمن عليج عقب خسارتكم 4 صفر. بي بي: شوفي سلامة: نحن في إنديا،، ما يسوي سالفة حق فوت بول،، نحن نحب واااجد كريكيت،، إنتم ما يعرفون كريكيت. أم صويلح: هالسوالف جديمة،، قومي عنها سلامة،، أمس عقب ما أغمى عليها سوت لنا محاضرة عن تطور الهند وامتلاكهم القنبلة النووية. بي بي: ماما،، أنا ما يقول شي يوم الإمارات يخسر،، ليش إنتي تشيه؟ أم صويلح: قصورج بعد بتقولين شي عن منتخبنا،، نحن ما طروونا عشرين صفر مثل بعض الناس،، لعبنا في كأس آسيا 29/ مرة،، فزنا 9 مرات وتعادلنا 7 مرات،، وين بعد بترمسين عن منتخبنا! سلامة: يدووه،، بحسبة بسيطة نقدر نقول إننا خسرنا 13 مرة،، صح يدووه؟