مشروع العمر

شقية: عباس، إنت وين يا بويه أنا و ولدك مول ما إنشوفك، شو عندك، شو ملهنّك عنا خبرنا !· عباس: حبيبتي أنا وااايد مشغول هاليومين بس، سمحيلي غناتي هالأسبوع وبنخْلص وبعوَضْج بلّلي يسْر خاطرج أم العيس مره ما يهمج!· شقية: شو يومين شو أسبوع ··· ما فهمت، شو عندك من شغل غير دوامك !· عباس: أهووو!··· يا بنت الحلال مشغول مشغول مع وفد اقتصادي جنوب أفريقي، شي في خاطرج أحينه، خلصيني مب فاضي للتحقيق مالج !· شقية: من متى إنت لك بهالسوالف، ومن وين وكيف طحت عليهم، وش عرّفك فيهم أصلا !· عباس: يا ربي من هالحرمة، إنتي شو عرفج بالبزنس إنتي لج الصافي بس، هذا يزاتي يومنيّ أفكر أحسّن وضعنا، وأفكْر حق ''عمرنا التقاعدي''!··· يا بنت الحلال خلينا نعرف إنسوي شوية بيزات بدال هالحَنة من الصبح!· شقية: يا ريّال بس أبغي أتطمن مب أكثر، وبعدين شو البزنس إللي بتسويه فجنوب أفريقيا، إنت تعرف مكانها على الخريطة، تعرف عنها وعن هلها شي، عندك معلومات وافية عن الجماعة اللي بتسوي شغل وياهم !· عباس: ليش شايفتني خبله ما عرف شي وله توني محوّل من اللنج !··· الجماعة مضمونين وعندهم شغل بالمليارات فكل مكان، وبعدين شكلهم مب نصابين، هذا إنتي دوم تشكيّن في كل شي!· شقية: شو نوع الشغل وشو هو المشروع مالكم · عباس: الله يسلمّج بنزرع غابات مطاط وكيوي وملوخية هني عندنا وعِدْالها بنبني مصنع تواير ''أورجانك''!!!· شقية: هاااا شو قلت !··· شو ياب المطاط على الكيوي ووين بتزرع وبتفلح إن شاء الله !!!· عباس: يا شقية الله يهديج إنتي شعرْفج في التصنيع والاستثمارات الحديثة !، أنا دفعت بلاوي عسب آخذ هذا المشروع حقي· هذا مشروع العمر إللي بيجلب حياتنا كلها، ما تدرين نحن أول ناس في العالم بنصّنع مطاط أخضر حق البيئة المستدامة، بنلقح بذر الكيوي والملوخية بالمطاط!، بنخفف من آثار ''البليوشن'' يا بنت الحلال، ويمكن بعد ناخذ جايزة الجودة من ورى هالمشروع !!!· شقية: يا مثبت العقل والدين!··· إنت تتكلم جد ولا تمزح ! على منو تضحك إنت بهالكلام، عباس، أكيد إنت مب صاحي، شي بلاك، شو مطاط أخضر وملوخية وتواير أكيد إنت ينيْيت، أنا بتصل في أبوي حنظل يلحقني ويشوف ''التاير اليديد'' شو يالس يسّوي، أنا باخذ عواس وبسير عند الحرّيم، عازمتنهن بنتغدا في مزرعة سويحان، و بْرايك إنت إيْلس مط وإنتف ملوخية ويّا الخُبرا جماعتك على كيفك!!!· عباس: وين وين بتسيرين ! أي مزرعة يا بويه المزرعة فيها عمال يشتغلون، يالسين يجلعون النخل هناك عسب نزرع شتلات المطاط والكيوي والملوخية مال المشروع!· شقية : حسبي الله عليك يا عباس على سواتك، تجلع نخل سنين !، خلاص وشيشي وخنيزي و برحي غير الهمب والطماط والذرة والورد، حسبي الله على بليسك !، أكيد سووا بك شي، سقوك من سحورهم و شغل اطبوبهم، قادوك وراهم شرات الخروف دون حاسّية، يا ربي من وين حلت علينا هالمصيبة !· عباس ''بعد يومين'': شقية شقية شقية!، إلحقيني أم العيس إلحقيني، طارت البيزات، شقى العمر راح كله!!!· شقية: هااا عسى ما شر· شو بلاك شو مستوي مزارع المطاط والكيوي احترقت !· عباس: جان زين!، الجماعة ''هفوا'' بيزات المشروع وفلوّا ما أدري وين !· شقية: يا حسرتي، شفت!، ما سمعت كلامي يومنْي أقولك، تذكر !، زين النصابين ما خلوّا لك شي مول !!!· عباس: هييه!، إتركوا لي في الفندق كرتون نعل مطاط زنوبة، ماركة وِرْ···وِرْ وكرتون كيوي وحزمة ملوخية يابسة، حسبي الله عليهم!!!· شقية: ما عليه··· مطاط أخضر هاااا !!· همسة : ''أشكر الفرح مرة والمحِن ألف مرة، لأكون كما يجب وليس كما أريد''!!!· فاطمة اللامي f_a6000@yahoo.com