الاتحاد

الرياضي

الله يحفظ عيالنا

فطوم: هذا اللي بتاخذونه من الكوورة·· الحرمة أمسات بغت تموت·
سلامة: أي حرمة·· أمي·· عن منو ترمسين؟
أم صويلح: أمج ترمس عن ''زليخة'' ربيعتي·· أمسات نتصل موبايلها ما ترد·· وآخر الليل ردت بنتها مريوم وقالت إن ''أمها'' مسكينة ارتفع ضغط دمها·· وطاحت عليهم في الملعب·
فطوم: هييي نعم·· ارتفع (عقبال دم بعض الناس) وكانت شرايينها بتنفجر بسبب الجول اللي دخله الكويتي مساعد في الشبكة العمانية·
أم صويلح: احترمي نفسج·· المباراة انتهت بالتعادل·· ما احتسبوا الجـــول·· انتي شـــــو فهمج!
فطوم: المهم ارتفع ضغطها من الجول·· (اللي ما احتسب) عشان ما تزعلين·· وهذا يا سلامة يا بنتي·· قدر كل العيايز اللي يتابعون الكورة·
أم صويلح: انتي ليس نحيسة·· قومي لفررج بشي وخليج تربين أحين·
سلامة: حرام عليج يدوو·· أمي تسولف وياج·
فطوم: خالتي هدي أعصابج·· بتحتاجينها وايد اليوم·
(بعد المغرب·· أم صويلح وربيعاتها قبل المباراة)
أمونة: عيل وين أم عبدالله؟
أم صويلح: ويييي·· تبغينها تشوف المباراة ويانا·· هذا المستحيل بعينه·
أمولة: ليش عاد؟ أمسات مرتزة بقهوتها والخبز خمير مالها·
أم صويلح: اليوم غير حبيبتي·· اليوم بتلعب اليمن مع الإمارات·
أمونة: وإذا بتلعب اليمن·· شو يعني؟
أم صويلح: أنتم ما تعرفون·· أم عبدالله عصبية·· ومتعصبة واااايد لمنتخبها·· وتدري بعمرها بتغلط·· عشان جي ما يت·
أمونة: تصدقين·· قعدتها حلوة، اتصلي فيها، قوليلها تيي·
(بدأت المباراة)
أم صويلح: تصدقون أم عبدالله ما ترد·
أمونة: أخاف استوى فيها شي؟!
أمولة: يمكن ارتفع ضغطها مثل ''زلوخ''!!
أم صويلح: ما ضني·· هي ما فيها ضغط·· ولا سكر·· ما شالله عليها، صحتها زينة·
أمولة: أكيد يتها سكتة قلبية!
أم صويلح: حرام عليج يا أمولة·· ليش ما تدانيها؟!
أمولة: هذا قبل الله يسلمج·· أحين أنا أموت عليها، والدليل·· قومي بنسير بيتها نتطمن عليها·
أم صويلح: تعرفين لو طريتي الأجوال الثلاث الي يبناهم فيهم·· تراني بزعل عليج·
أمولة: عيل بخبرج··· ما بسير·
أم صويلح: بس تعرفين·· مب قادرة أيلس·· ابغي اسير اغايضها·· مب قادرة، روحي الرياضية عالية جدا·· وبعدين النونو ما قصر·


alsaadalmenhaly@hotmal.com

اقرأ أيضا

حمدان بن محمد يشهد سباقات «الإيذاع» في المرموم