الاتحاد

الرياضي

بليون.. ومليون!

بي بي: ماما،، الساعة كم في مباراة؟

أم صويلح: كوريا الجنوبية واستراليا خمس وربع،، وإن شاء الله يتعادلو ونفتك منهم. وعقب الهند والبحرين ثمان وربع،، وإن شا....

بي بي: وإن شاء الله الهند تفوز..

أم صويلح: قلعتج،، أونه تفوزون،، وحق شو تفوزون،، عشان الكوريين عقب يجيبون فيكم 80 جول،، عقب ياخذون كأس اسيا بفارق الأهداف؟!

بي بي: ماما نحن لازم نفوز،، تعرفين لو الهند يفوز كم نفر فيه فرحان؟ في الهند 1.17 بليون نفر هندي،، وتعرفين لو البحرين فازت كم نفر فيه فرحان،، مليون و107 نفر بس، يعني مين لازم يفوز؟!
أم صويلح: شو هالحسبة العجيبة يالخبلة؟ جيه،، البليون بيلعبون وياكم؟!. في الكورة في حسابات غير.

بي بي: كيف غير؟

أم صويلح: البحرين ياذكية لعبت مع كوريا الجنوبية وجابت فيها جول،، صح كوريا فازت في النهاية بثنين واحد،، لكن عالاقل يابو جول،، وتعرفين يالذكية إن البحرينين في 2004 في كأس اسيا في الصين وصل إلى الدور قبل النهائي!

بي بي: شوو يعني هذا كلام وااايد؟

أم صويلح: يعني انتم ما تملكون الفرصة،، وما لكم أمل.

بي بي: ماما،، إنتي ما تعرفين،، في الهند سر عظيييم،، ما حد يعرفه،، بس نحن.

أم صويلح: أونج احين خوفتيني،، ويوم عندكم سر عظييييم عقولتج،، حق شو ما ظهر جدام كل الي لعبتو وياهم قبل،، كللللهم يطروكم طر.
بي بي: ماما،، إنتي ما تعرفين...
(تدخل فطوم)

فطوم: أكيد تحضرون حق حفلة الهورد الليلة؟

أم صويلح: اي حفلة،، وأي هورد؟

فطوم: جييه؟!،،، الهنود اليوم ما يبلعبون،، وبتجلبين لنا البيت عرس هندي،، وعقب بينجلب لفيلم هندي،، كل الابطال يصيحيون في النهاية؟!

أم صويلح: ماشالله فطوم،، مستوي دمج خفيف ما شاء الله عليج،، ضحكتيني،،، هي هي هيييي.

اقرأ أيضا

الشارقة وبيروزي.. تحديد المسار