سبيجه: أقولج مباراتكم الساعة كم؟ أم صويلح: نفس وقت مباراتكم.. سبع إلا ربع. سبيجه: لا.. نحن مباراتنا ست و45 دقيقة. أم صويلح: لا والله.. قولي والله إنتي بس.. الحمدالله والشكر. سبيجه: شبلاج ياحرمه! أم صويلح: ترى نفس الوقت.. مستويه مصومعه على قولتكم. سبيجه: عن الغلط.. مو كفايه ظلمتونا.. وبعد تغلطين! أم صويلح: أي ظلم ياحرمه.. مسرع ما نسيتي أمس محلاج تغنين وتدندنين.. الله يغربل هالبرامج الي تخرب علينا. سبيجه: لا.. نحن صدق إنظلمنا. أم صويلح: بسج يا سبيجه.. المباراه انتهت.. وفزنا عليكم. وإحتفلنا وغنينا.. مووول مالها داعي هالرمسه. سبيجه: هذا مو كلامي.. هذا كلام المحللين.. الكل يقول جولكم الثاني موصحيييح. أم صويلح: وليييه ما يبتو جول صحيح عقب جولنا؟ سبيجه: وين نييب.. ما كان باجي وقت.. بس عشر دقائق! أم صويلح: ونحن يبنا جولنا الثاني عقب جولكم بعشر دقائق. يعني هالوقت كافي تيبون فيه إلي تبونه. سبيجه: ظلمونا.. كلهم قالوا الحكم يتدرب فينا. أم صويلح: أقولج سبيجه.. في مثل بحريني واااااااايد حلو يقول: ما عرفت ترقص قالت الأرض عوجة. سبيجه: هااا! أم صويلح: من قال هاا.. سمع. سبيجه: إيش تقصدين؟ أم صويلح: تعرفين شو أقصد.. تدورين أي سبب تبررين فه خسارتكم.. ماله داعي.. وخل عنج هالسوالف وقولي إنشاالله تتوفقون اليوم مع قطر.. صدق بيبرد قلبج لو فزتم. سبيجه: قلبي أنا بيبرد!!.. قولي فؤادج إنتي.. أدري فيج. أم صويلح: الغالية.. قلبي بوووورد ومرتووح... على قولتكم. سبيجه: يا الله يارب بحق هالجمعة الطيبة تفرح أهلنا في البحرين وتسعد ليلتهم بفوز منقطع النظير.. وووو.. أم صويلح: بس سبسس بس.. لهني وبسج. ويارب تفرح قلوبنا بالنقاط التسع للأبيض وتسعد شبابنا وتفرحهم بهالمنتخب الذهبي.. قولوا آميييييين.