الاتحاد

الرياضي

أم صويلح

(مكالمة بين ''أم صويلح'' في أبوظبي و''زليخة'' العُمانية في مسقط)
بي بي: مااااامااااا·· جلدي جلدي هاي ماما ''زليخة'' من عمان·
أم صويلح: وينها وينها؟
بي بي: لااا ماما،، هاي في التليفون·
أم صويلح: السلام عليكم اشحالج ''زلوخ'' عساج بخير؟
''زليخة'': بخير وعافية بارك الله فيش·· شخبارش وشخبار ''فطوم'' وسلامة''؟
أم صويلح: يسرج حالهم، و''فطوم'' حامل، بتربي هالأيام·
''زليخة'': بالبركة انشالله، عيل ما بتقدرين تيين مسقط تحضرين المباريات مثل ما اتفقنا!
أم صويلح: وأنا إيش لي؟ تراني قايلة من قبل، بسافر مسقط آخر الأسبوع الياي وبحضر مباريات الأبيض·
''زليخة'': وفطوم؟
أم صويلح: تصدقين ''زلوخ'' أحس هالخبلة ''فطوم'' رتبت حملها تبغي تخرب علي شوفة المباريات·
''زلوخ'': والله انتي تضَحكِين، الله يعين ''فطوم'' عليج·
أم صويلح'': أكيد جي بتقولين، ما تعرفينها كثري·
''زليخة'': بخبرج·· بتيبين ''بي بي'' وياش؟
أم صويلح: وأنا وين اقدر استغنى عنها، منو بيسويلي قهوتي·
''زلوخ'': باغنش تخلصين أوراقها من وقت، عشان ما تتورطين عقب·
أم صويلح: اليوم بخبر ''صلوح'' وإنشالله ما يتناحس علي·
''زلوخ'': خبري بعد ''أم عبدالله'' جارتش اليمنية، وترا بيتنا يوسع كل أحبابش يا أم صالح·
أم صويلح: جي خبلة! ما بخبر حد، حتى ''امون'' وأمول''،، ولو دروا بيحتشرون علي، خلهم جي أحسن·
''زليخة'': أبغي الكل يحضر فرحتنا بالكأس·
أم صويلح: اسميج يازلوخ،، تبغينا نيي عندج نشجع منتخب عمان، مسكين حالج، أبوي،، انشالله بنرد الكأس ويانا·
''زليخة'': خليني أقولش، حامل اللقب هالمرة، منتخب جديد، وبعد ما وصل '' السويق'' و''النهضة'' لنهائي كأس السلطان لأول مرة في تاريخه، زاد عندي الأمل، وأنا أقول، الكأس لنا أو للبحرين·
أم صويلح: وتبغيني بعد أيبلج ربيعاتي؟ لو دروا بلي تقولينه بيذبحونج، متعصبات وايد، ''أمون'' تشجع الأخضر السعودي، و''وأمولة'' بغت تموت علينا يوم منعوا الكويت من اللعب، ووزعت هريس على الجيران يوم ردهم ''بلاتر''، و''أم عبدالله'' تعرفينها، ما يحتاي·
''زليخة'': مع هذا البرد، حلو التعصب،، بيدفينا، الأهم عقب كل المباريات نرد رباعة، ولا كنه استوى شي

اقرأ أيضا

27 لاعباً في قائمة «الأبيض» لمعسكر البحرين