الاتحاد

دنيا

مدونة أم صويلح

بدون مقدمات·· بقول وبصراحة··· ''فطوم'' حرمة ولدي مظلومة، والصراحة ''صويلح'' شلني وياها بسواته السودة· ما بجذب عليكم·· يوم خذيت ''فطوم'' حق ولدي·· البنية كانت دارسة، هي صدق مب جامعية، بس الحرمة تعلمت وخذت شهادة أحسن عن شهادة ''صويلح'' الساقط ثاني إعدادي· هي صدق نحيسة، لكنها فطينة، وماشالله عليها، حرمة سادة بيتها وفوق هذا تشتغل وتساند· قبل·· كان مب عايبني شغلها، لكن عقب غيرت رأيي·
مب هاي السالفة·· البنية من أسبوعين منشغلة وترمس في التليفون أكثر عن العادة، وأخيرا صرحت وقالت، أنها تبغي تاخذ رخصة تجارية وتشارك ربيعتها وبيفتحون خياط، كانت البنية فرحانة وفرحتنا وياها، ووعدتنا تخيط لنا ثياب على حسابها بعد، وتكلمت عن الأرباح اللي بتحصلها، لكن هالفرحة ما طولت، تراها نحيسة، إذا هي ما نحسَت على حد، ييلها إللي ينحس عليها·
رفض ''صويلح'' مشروع ''فطوم''، وخذاها بشراع ومجداف، وهددها يسير دوامها يضارب الحرمة اللي بتشاركها، يقول إنها مخربة رأس زوجته؛ إللي قهرني في السالفة يوم طاح في الحريم، وقال حق ''فطوم'': ''شو فهم الحريم ف التجارة، التجارة يبغالها عبالة رياييل، وانتم يالحريم ما تفهمون إلا بصرف البيزات''· أنا ما تدخلت كعادتي يوم يتضاربون، بس بصراحة ما خليت السالفة في خاطري·
ثاني يوم كلمته، وذكرته بسالفة جديمة يوم بغى يشارك ربيعه براسمال ويشتغل في سوق الأسهم ويودِّر وظيفته، اشتطت عليه ''فطوم'' ذاك اليوم، وقالتله: ''لا تتهور''، وخبرته عن الناس اللي جازفوا في الاسهم وعقب ابتلوا بديون وأمراض· ويوم ''صويلح'' أصر، طلبت منه ''فطوم'' أنه ما يودّر وظيفته، وياخذ أجازة بدون راتب· عقب ثلاث شهور أعلن ''صويلح'' خسارته وضياع بيزاته، وحمد ربه أنه ما ودَّر وظيفته·
عقب ما ذكرّته بهالسالفة··· وجم، وصخ، وعقب قام عني وهو يقول ''فطوم ما بتسوي المشروع يعني ما بتسوي المشروع''··
مو أقوللكم فشلني ''صويلح'' مسود الوجه·

اقرأ أيضا