الاتحاد

الرياضي

الضفر ما يطلع من اللحم

ام صويلح: زلوخ·· بسألج·· شو بتعشينا اليوم لو فزتم؟
زليخة: شو بعد لو فزتم·· امييي· نحن فايزين فايزين·· اطلبي العشا الي تبغنه·· بنسوي من تو؟
أم صويلح: ضروري امييي تزهبينه من أحين·· أخاف عقب ترقديني بدون عشي·· ما أضمن موقف منتخبكم اليوم·
زليخة: عن الخراط·· قولي·· مو تبغين؟
أم صويلح: لحم شوا
زليخة: مووووووووووو؟
أم صويلح: شوا·· وايد على؟
زليخة: لا الغالية·· لكن هذا يباله عبالة·· لازم ندفنه قبلها بثلاث أيام·
أم صويلح: وعشان جي·· آضني لازم ندفن اليوم·· وناكله عقب·· ومهما كانت نتيجة مباراتكم·· ترانا لازم نطلع الدفان وناكله·
زليخة: اترايش منتي سهلة يا أم صويلح·· تخطيطك استراتيجي·
أم صويلح: عيل شو!!
(مكالمة هاتفية بين أمولة وأم صويلح)
أمولة: والله انج قوية!!·· بتسيرين تحضرين مباراة منتخبهم·· عبنو·· مب خايفة علي عمرج؟!
أم صويلح: من شو أخاف يالخبلة·· ليش أنا في غزة!·· هايول أهلنا ونسايبنا وجيراننا·· وضيافتهم مافي مثلها
أمولة: ما دريتي شو سووا في سيارة سلوم ولد أختي·· كسروها وطروا توايرها بعد!
أم صويلح: يستاهل سلوم·· هالولد من يومه راعي مشاكل·· الله انتقم منه في الأراضي العمانية·· بعدين لا تحاتين أنا ما عندي سيارة·· بنسير المباراة فسيارة مريوم بنت زلوخ·
أمولة: إنتي مب صاحية!
أم صويلح: كبري راسج يا أمولة·· الضفر ما يطلع من اللحم·
(ام صويلح وزليخة في استاد مجمع السلطان قابوس)
أم صويلح: يايبتنا من الصبح·· ليييييش؟
زليخة: هين من الصبح يالظالمة؟!! تعرفي كم الساعة تو؟·· 12 ونص·
أم صويلح: صدقج·· 12 ونص مب الصبح·· عنبوا·· جي يسوون في ضيوفهم؟
زليخة: ضيوفنا على العين والرآس·· لكن الغالية دي مباراة مصيرية·· وأنا ما أضمن أحصل مكان لو تأخرنا·· وبعدين انتي مو ناقصنش؟·· غداش وجبناه·· والقهوة والقراص والغراميل وجبناهم·· موباغية بعدش؟·· استريحي وقولي يارب·
(خلال المباراة)
أم صويلح: أقولج·· وين القراص؟
زليخة: موووو فيش؟!!·· حشرتيني·· خليني أشوف المباراة
أم صويلح: أقولج دام الشوا يباله ثلاث أيام·· اليوم بمناسبة الفوز نبغي عشانا سي فود
زليخة: موو سي فود بعد؟!!·· الغالية اليوم ماشي عشا·· عرسنا ف الشارع·· يعني تك أوي·· هامبرجر دجاج

اقرأ أيضا

هزاع بن زايد: «أصحاب الهمم» يضربون المثل في التحدي والإرادة