الاتحاد

دنيا

إلا·· نفنوف العرس

كل شهر وأنتم بخير، وكل راتب وأنتم أخيّر، وإن شاء الله تكونوا مسددين كل ديونكم، وهالدعوة أخص فيها مرت ولديَ المصون ''فطوم'' وبنتها ''سلامة'' الماخذين بيزاتي· هي هي ··· لحين ما وصلت بيزاتي، الظاهر بعده وقت، اسمعها تسولف ربيعاتها، تقول أن جمعيتها ما كملت، ومرة طلبت مني أدش وياها الجمعية، وانا ماااااا داني هالسوالف·
بس تعرفون، صدق ''فطوم'' سامجة، لكنها والله تسوى طوايف ''لطوف'' السلحية مرت ولد رفيجتي ''أمون''، وكل يوم اصلي ركعتين شكر، يوم إن هاي السحلية مب كنتي· تذكرون نحاستها على صهرتها ''عوشة'' وكيف شرجت ريلها وخلته يخرب عرس أخته ويحلف يسوونه قبل الموعد، بست شهور·· أونة ''عوشة'' طالعة بالخشة ويا خطيبها· حسبي الله عليها، بغت ''امون'' تموت يوم حلف ولدها يعجل بالعرس ويسويه الأسبوع الياي·
لكن هيهات وهيهات·· ما ناقص إلا هالسحالي والزعاطيط يخربون فرحنا· صدق ''امون'' طيبة وفقيرة، لكنها ما لها غير هالبنية، ويوم ان عرابين الكوشة والصالة والصالون والمقهويات والفرقة راحت عليها، ما ارتجت، لكنها شلت الدنيا يوم درت، أن بنتها ''عوشة'' ما بتلبس فستان أبيض، وحليلها بغت تموت علينا، وقامت تضارب ''لطوف'' لااا·· وضربتها بعد، وبالزور فكينا الثنتين من بعضهن·
وما انتهت السالفة هني، ''امون'' اتريت لين رد ولدها البيت، وضاربته، وقالت له: إذا ما منعت زوجتك عني وعن بنتي، بيتي ما يسعك -ترا البيت الله يسلمكم مال المرحوم ريل ''امون''-، ويوم ولدها سمع هالرمسة تيبس، وين بيسير بهالسحلية ''لطوف'' لا عنده بيت ولا والإيجارات نااااار· تَم عقب صراخ أمه يزابد ويرادد، و''أمون'' أصرت على موقفها وقالت له: (والله أني عشت لشوف ''عوشة'' بثوب عرسها، تبغاني اموت بحسرتي، والسبة لعانة ''لطوف''؟ قم اطلع من بيتي انت وهالسحلية!!)··· هييييييي نعم، ''امون'' طردت ولدها، والسحلية·

ام صويلح

اقرأ أيضا