الرياضي

المدينة الفاضلة

اللي يفكر ان الشغل في الرياضة بيكون مدينة فاضلة كلها ورود تراه يحلم، واللي يفكر ان كرسي الرياضة برستيج تراه شكله ما عاش ويانا ولا يدري ان كرسي حلاق وبدون سيشوار بعد.
اذا ما تتحمل النقد لا تشتغل في الرياضة، واذا ما تقدر تتحمل الناس والجمهور وصراخهم وهجومهم بصدر رحب وترد بصدر أرحب لا تتكلم الله يرحم والديك وبعد لا تشتغل في الرياضة.
حتى انته اذا ما تفرق بين الشخصنة والموضوعية لا تستعمل هالكلمات دخيلك.. و الحبيب اذا ما تقدر تكون قلم حبر مب قلم رصاص وتخاف من هذا المسؤول والاداري هذاك ولا من الجمهور الفلاني وتويتر حوّل عالمحليات ولا صفحة الفن والفاشنستات بس اتحمل من جمهور أحلام تراه بعد من نفس الجينات.
وايد متوترين هالسنة ومحد يتحمل الثاني ونحن تونا ما خلصنا شهر وكل واحد معصب ويفاتن شو ياكم.. تراكم مب يداد عالرياضه وكل واحد منكم صار له سنين وبنين في هالمجال يعني متعودين على هالسوالف.
ولا خلاص صار تويتر والتغريدات هي اللي تحرك مشاعركم وتثير اعصابكم !
ومن يرد عليكم ياهل في تويتر ويكتب (اجلده) استانستوا وتحسبتوا عماركم الزير سالم ولا عنتر بن شداد وشالين سيوفكم وبتحاربون!
هدوا يا شباب ولا يا شواب تراها الا سوالف ولا تخربون علينا الدوري وحلاوته ترى ما تم لنا غيره بعد ما تفشلنا في تصفيات كاس العالم، وطلعنا من كاس الخليج بهدف واحد لو ندري كنا جهزنا تلفوناتنا وصورناه من كل الزوايا وخذنا معاه سيلفي.
عموما هذي الرياضه وهذي خلاقينها ومتعودين عليكم بهالشكل من اداريين ولا اعلاميين وبنتم نطالعكم ونضحك وكيفكم انتوا.
عموما بعيد عن هالسوالف شفتوا العين 18 النسخة المجددة شي عجيب وممتع بصراحه ويطربك بلعبه، خاصه مع الشحات اللي بيخلي كل الاندية تروح مصر تدور لعيبه بدل اللعيبه الغش المتعودين عليهم وفوز مب أي كلام هالفوز على عيمان الأسبوع اللي طاف كل المحللين فرحانين فيه، ويقولون انه ماخسر من ما دري كم جولة لين ما عطوه عين وخلوه يخسر من العين وعلى قول ربعنا المصريين اللي احبهم واحب استشهد بكلامهم خمسه وخميسه عالعين.
العين ترى ياجماعه يسوي كل هالاداء وبعد بعض ونعيدها بعض ولا اقولكم يمكن اغلب المحللين يقولون انه ما يأدي وما يلعب زين!
تعال انته وياه شو تبغي يعني اللعيبه يسوون؟ تراهم متصدرين ومرتاحين ومتنومسين ولا عليهم، ولا خلاص السالفة بنمدح نادي مهما كانت نتائجه ولو مدحنا المتصدر بنكون مجاملين!
خل عنكم هالنفسية وعطوا المتصدر حقه مثل ما انبح صوتكم مع صداره الوصل.
ولحد ينشب ويقول تغلط ترى قلنا الرياضه سوالف وحلاتها بهالسوالف.