الرياضي

ذكاء اصطناعي

أخيرا شفنا المنتخب الأول مع المدرب اليديد زكروني في مباريات نقدر نحكم عليه فيها ونطمن على لعبيتنا، وهل استوعبوا الصدمة ولا بعدهم عايشين الحلم معا نستطيع!
البوادر طيبة واللعب بطريقة يديدة وايد زين عقب ما تم حد في الشارع ما انتقد طريقة مهدي، وبيني وبينكم ترى شفنا شي زين من الفريق أحسن من اللي شفناه في المباريات الثلاث مع باوزا اللي سمعت أنه بينشال قريب بعد على عوايده من المنتخب السعودي وروسيا ماكو.
تعالو شو سالفة الحكام !
الفيديو أخيراً جربوه واصبروا شوي ترى الاتحاد يمشون على بيض يمكن الموسم الياي يطبقونه فعلياً اذا شدوا حيلهم.. بس معقولة الاتحاد راضي عالحكام ومستواهم وانه كرة القدم لعبة أخطاء!
حتى المباراة اللي الكل يتابع فيها كابينة الفيديو وزحمتها من أعضاء الاتحاد استوت فيها أخطاء تحكيمية تضحك، وتوهق الاتحاد لأن الوصل فعلاً الوحيد اللي يغرد خارج السرب بأهداف ليما وأخطاء الحكام.
حتى الوصلاويين مبسوطين وماصاروا يدافعون عن هالنعمه اللي حلت عليهم، ويدعون أنها تستمر ترى يا ما فرق ثانية كانت تستفيد من كوارث التحكيم قبل بالكيلو شو المشكلة لو استفاد الوصل شوي .
بس المصيبة انه اللي يتضررون هم الفرق الصغيرة، والهوامير دوم صوتهم مسموع وحاشرين الدنيا ولا معقولة كل مباراة تقريباً الظفرة يتكفخ من الحكام ومساكين الإدارة على كثر ما يحتجون الاتحاد ولا يسأل عنهم ولا يتعنى يرد عليهم والجرايد يادوب تحط لهم خبر صغير والتلفزيونات تسوي لهو طاف من ايي دورهم في النقاش.
زين انه هالسنة ما شي نزول تقريباً ولا شفنا مصايب وترى زين انه مارادونا يدرب في الدرجة الأولى عشان الكل ينتبه انه الحكام حتى هناك مشي حالك، ولو حضرتوا مباريات الصغاريه بتشوفون العجب وكيف مستقبل التحكيم عندنا، نحن مب بس محتاجين فيديو ولا حكام أجانب نحن محتاجين ذكاء اصطناعي للتحكيم، والمؤشرات واضحة ماتحتاج حد يقراها الا اذا ماتشوفون راجعوا عيادة العيون ترى نظركم فيه شي.
أخيراً أحمد خليل واختبار يديد بيدخله اتحاد الكرة مع سالفة السقف اليديد القديم اللي عيز اتحاد السركال وبيعيز اتحاد بن غليظه.
سالفة أحمد خليل محد فاهمنها والغريبة قوم بو لسانين اشوفهم صاخين ولا يطرونها ولاطلعت لهم مصادر ونصايح على عادتهم!
المهم أحمد نصيحة لاتروح يمين ولا يسار دور لك أقرب طيارة وسافر واحترف في أي مكان وحسسنا انه فيه واحد من اللعيبة عنده حلم.