خليجي 21

يوميات أم صويلح


بالخمسة.. يالبرتقالة!!
أم صويلح: شو من طلععععه!!.. الصراحة روعة. أكثر شي تونست به هالكشته الغاويه.. تسلمين يا سبيجه. ماقصرتي.
سبيجه: أدري أنج بتستانسين في الصخير.. لكن موب لهالدرجة.. ما عندكم بر؟
أم صويلح: عندنا.. وبرنا غاوي.. ويوم بتيين البلاد بوديج عوافي.. لكن ما عندنا شجرة الحياة.
سبيجه: عيبتج؟!
أم صويلح: شجرة عجييييبة.. معقولة مئات السنين بروحها في الصحراء واقفة بشموخ.. لا ماي ولا شيئ. سبحان الله!
سبيجه: من خلقت وأنا اسمع عنها.. يقولون عمرها 400 سنة.. يعتبرونها من عجائب الدنيا إلي ما تتكرر.. مثل صعودكم للنهائي.
أم صويلح: حبيبتييي.. هالرمسه موب علينا.. نحن خذينا الكأس من قبل.. وخذينا المركز الثاني في ثلاث بطولات.. خليجي 1986 و1988 و1994، وخذينا المركز الثالث في ثلاث مشاركات.
سبيجه: شوي شوي.. خفي علينا يالكمبيوتر!!
أم صويلح: هالأرقام موب من عندي.. هاي على ذمة راشد الزعابي في ملحق الإتحاد الرياضي.
سبيجه: وإذا غلط؟؟
أم صويلح: إثبتي العكس.
أم صويلح: خليني اقولج شي غريب.
سبيجه: قولاي.
أم صويلح: تصدقين أن المباراة على المركز الثالث ما استوت إلا مرة في تاريخ البطولة من 42 سنه.. وكانت بينكم وبين الكويت، وإنتم فزتم فيها بالثلاث.
سبيجه: حلو.. خليني أنا أحين أخبرج الي ما تعرفينه.
أم صويلح: شو عندج؟
سبيجة: تعرفين كم مرة الامارات لعبت مع العراق؟
أم صويلح: أونج تعرفين؟!!
سبيجه: لعبتو 9 مرات في بطولات كأس الخليج.. ولا مرة فزتم. يعني أموركم صعبة.. بياكلونكم العراقيين أكل.
أم صويلح: الغاليه.. هذا قبل.. الحين تغيرنا وشهيتنا انفتحت.. خذينا البفكي القطري.. وكلينا الحلوى العمانيه.. وتسلينا بالمتاي البحريني.. وحلينا بالدرابيل الكويتية.. والحين باجي الفاكهة.. الحين وقت البرتقاله العراقية.