الإمارات

ترحيب

في أوَّلْ العامْ والفرحَهْ تعايدنا
تَمْ الفَرَحْ يومْ زارْ وشرَّفْ القايدْ

شوفكْ لنا عيدْ بوخالدْ ياقايدْنا
في عامْ زايدْ هلا يامشبِهٍ زايدْ

بكْ تفرَحْ الدَّار وتودِّكْ قصايدنا
سرْ للعلا دومْ وإنتهْ للعلا رايِدْ

ياكنِّكْ الغيمْ وتجدِّدْ جدايدنا
يحيا بخيركْ وطَنْكْ ويتعَبْ الحاسدْ

مِنْ صدِّيتكْ دومْ مدمايهْ صوايدنا
ياحِرْ ما ينلقىَ عَنْ صيدتهْ حايدْ

بنيتْ داركْ وعاشَتْ بكْ بلايدنا
وحميتْ جاركْ وكنتْ الصَّادق المايدْ

نشهَدْ بأنِّكْ وحيدٍ في شهايدنا
ماحَدْ مثلكْ أبَدْ ماكادكْ الكايدْ

لكْ في السِّياسِهْ إفتكارْ لمِنْ يعاندنا
وفي العسكريِّهْ خصومكْ حيلهمْ بايدْ

إنتهْ وأنا مولْ مانبدِّلْ عوايدنا
عَ دَربْ واحدْ نسيرْ وقَلْبِنا واحِدْ

محمد بن راشد آل مكتوم