أصل الحكاية، من البداية للنهاية، من القهوة، قعده وسلطنة ولمه، هوان ومن جوه غليان، وناس تنقل كلام، وسيرة الناس حكايات، مين وفين وليه وكان، وكبرنا قبل الأوان، وعرق الغضب، طالع في طلقة من زناد، أضرب يا واد، وعشق العصافير على الأسلاك، والصبر على المكتوب، يجيلك ساعي البريد بجواب، أو تحضر الباسبور، يا صبر أيوب، وترجع تستنى المكتوب، ما هي القهوة إيه؟ ناس ومقاعد.. دومينو ورهان على العمر، بالأيام والشهور والسنين، كسبان وخسران، الباشا والبيه والغلبان، الكرسي يحكي حكاية صاحبه، من بدايته لنهايته، وشوش تداوي، ووشوش تحير، شيشة وفحم درجة أولى، أنفخ وطلع غلب السنين، دخانه تايه في الجو، يحكي هَمْ الحزين، شحات يمد ايده للقاعدين، لله يا محسنين، وناس رايحة وناس جايه، ومن شكلك تبان حكايتك المبسوط مبسوط، والحزين حزين، وتطول القعدة وتمر السنين.
عمرو أبو العطا
عدد اليوم
