ام عبدالله: شوفي فديتك، أنا جهزت لك الباخومري، والقهوة، وسويت العصيدة، كل شي جهز، بس باقي تخلي لنا مكان في سيارتكم·
أم صويلح: وريلج،، ما بيحتشر عليج مثل ذيج المرة؟
أم عبدالله: فديتك، بالعكس، هو كمان قال بيجي معانا·
ام صويلح: عيل زين، لأننا طلعنا باصين، واحد للحريم والثاني للرياييل·
بي بي (الشغالة): ماما ماما، ليش ما يقول مال أنا يروح مع انت، مثل كل مرة·
أم صويلح: أنتي وين تسيرين ويا هالدهن اللي في راسج، بيسطل بالمشجعين واللاعبين·
''بي بي'': أنا في غني حق منتخب·
أم صويلح: ومن قالج محتاجين غناج، الإمارات اليوم كلها بتغني اليوم أن شالله، وكل حريم الفريج بيسيرن، كلهن متحمسات، وقالوا بيطلعون المسيرة بعد·
ام عبدالله: إيش هذا يا أم صويلح، أصبحتي من قائدات الحركة النسائية، من بعدك تحركوا الحريم، ما كان حد يشتي يطلع من بيته·
أم صويلح: مب كل يوم عندنا هالفرحة·· ايه والله·
(تلفون أم صويلح يرن)
أم صويلح: هي·· هي،، ادري أدري، قولي والله، وحليلها، خلاص خلها تيي ويانا·
(········)
أم صويلح: لا تحاتين بيسد، وإذا إمتزر بناخذ باص الرياييل، خله يدبرون أعمارهم·
(········)
أم صويلح: فديت عمرج،، حطي في بالج، بنصلي الظهر وبنطلع، هناك بنتغدا ولا تنسين دواج····· في أمان الله·
سلامة: يدووووو، يدووووو، وصلن ربيعاتج، والباصات بعدها·
أم صويلح: حسبي الله عليك يا خان فشلتنا ويا الحريّم·
ام عبدالله: لا تحاتين بقهويهن·
سلامة: شو بنسوي يدووو·
أم صويلح: ما عليج، ناديهن، بسويلهن ''برافات'' تشجيع للمنتخب، مثل ما كان يقول خالد حرية، بنصك اليوم عليه·
(فطوم تفاجأ بهذا العدد المهول من الجارات في بيتها)
فطوم: الله واكبر عليك يا صالح أنت وأمك، إللي ما خلت عيوز في الإمارات إلا ونادتها·