يوميات أم صويلح

فطوم: ما شفت يدتج من الظهر، وينها؟ سلامة: في المطبخ، هي و''بي بي'' اشكثر أكلاااات مسوين· فطوم: ليش إنشالله؟ عرس! سلامة: يدوو تقول، بتوزع على الجيران هريس، تراها واااايد مستانسة· فطوم: أنزين هاي وعرفناها، حق شو مسوية أكلات؟ سلامة: ترا يدوو عازمة أم عبدالله وزكوي، بيتغدون عندنا اليوم· فطوم: عزيمة في بيتي وأنا آخر من يعلم؟ (تدخل أم صويلح) أم صويلح: وليش تبغين تكونين أول من يعلم، تتحريني بآخذ الإذن منج إنشالله!! فطوم: ما قصدت، لكن بعد، إذا حريم بييون بيتي لازم أعرف· أم صويلح: أي حريم؟ أم عبدالله وزكوي استووا حريم·· ؟ خل عنج، سيري خبري صويلح، ما ينسى الفالة، تراهن بيونسنا لين العشى· (بعد المباريات) أم صويلح: بسج يا أم عبدالله، صدعتي راسي، من يلستي وأنتي تصيحين، وشو يعني لو ما خلاج ريلج تسيرين المباراة، ترانا فزنا عليكم، يعني وجودج كان بيغير النتيجة، ولا شكلج تصيحين لأنكم مهزومين؟! أم عبدالله (الجارة اليمنية): أيش مالك تذكرين نحن في المباراة، نعم عشان انتوا صعدتوا، تعملين كدا فينا، ما ينفعش كدا يا أم صويلح، راعي شعوري· أم صويلح: فديت عمرج، ما قصدت اجرح شعورك، بس بغيتج تتونسين، وتفرحين بفرحتنا، عيل ليش تابعتي مباراتنا مع الكويت وماتابعتي مباراتكم مع عمان· أم عبدالله: كيَف تشتيني أنسى، أكتشفت أن زوّجي بخيل، زعل لأني وزعت العصيدة على الجيران· أم صويلح: خل عنج، من عرفناه وهو جذي· أم عبدالله: صح صح، لكن تعادلنا مع الكويت كان حدث عظيم، ما توقعته كدا يفعل· زكوي: وابوي عليك وعلى زوجك، شكله مقهور لأنكم ما صعدتوا، ماعنده روح رياضية· ام عبدالله: انتم تتحدثوا عن الروح الرياضية لأنكم فايزين، وصعدتوا النصف النهائي واحدة بتسع نقاط، والثانية بأسرع هدف في الدورة للآن· زكوي: وأبوي من عيونك،، أنا جاية أتونس ولا جاية أنحسد؟! ام صويلح: صخن عاد يالعجايز، صدق مخرفات، خلينا بقهوة أم عبدالله، وحلوى زكوي، خلينا نفرح سوا يا أحلي خليجي انتو·