لفت الانتباه: هالأيام الناس تشد الانتباه.. يوم تستخف وتسوي اللي تباه .
ملاحظة مرورية: يوم تسوق موتر صالون عقب سواقة الفورويل.. تحس بعمرك قملة مقصوعة.
حفل زفاف: هالأيام تدخل المول بس باقي تسمع: «عليه سعيد.. عليه مبارك.. عله يتبارك».
الوزن المثالي: عزيزي وزني المثالي.. متى بتستوي شرات الأوادم وبتراويني شيفتك؟؟
مدارس زمان: جملة من زمان ما سمعتها: «أول شيء نوحد المقامات» .
حكمة عصرية: لن يحرق الشاي الأخضر «ثروب» عمرها الزمن!
خطوط كتابة: ناس خطها شرات الفنانين كله زخارف ورسم وناس خطها شرات الدكاترة مله رموز وطلاسم.
نسبة مطردة: لازم نخفف نسبة المجاملات في البلاد لأنه نسبة اللي مصدقين عمارهم زادوا!
الناس أجناس: كل شخص يمر في حياتك يا يترك: بصمة أو أثر أو يعل العين ما تشوفه!
نقاش عام: النقاش الجدي يفرز فئتين من الناس: قوم بو شهادة وجامعات أو قوم بوخربطان المنتديات.
رجيم قاسي: اللي يقررون يسوون رجيم نوعين:
نوع من أول يوم تسويلها برنامج وتلتزم وما تخرب لو محتاجة، ونوع من أول يوم تشتري سوالف الرجيم من الجمعية ويتم لين يخيس في الثلاجة.
حرية الملبس: زادت نسبة العنقاش في البلاد والسبب، كل حد حر في لبسه!
سؤال شهري: أكثر سؤال يتكرر كل 28 الشهر، «كم استوت تفويلة موترك؟».
ذكريات قديمة: بعض الذكريات بداخلنا تحتاج إلى «مخمه»!
حوارات جريئة: بعض المواضيع وردات الفعل تحتاج فقط إلى «نغزة»!
طريقة الأكل: الناس اللي تاكل نوعين: ناس تاكل وتخلص ولا تخيس ثيابها وناس تاكل والأكل مسوي شوارع في ثبانها!
الوعي الثقافي: نحن ما نعاني من محو الأمية في التعليم.. نحن نعانيها في «السنع»!
تقدير صيفي: تحية تقدير وعرفان لكل موظف «زبن في البلاد في الصيف ولا سافر»!