الجمعة 29 مارس 2024 أبوظبي الإمارات
مواقيت الصلاة
أبرز الأخبار
عدد اليوم
عدد اليوم
الرياضة

«قهوتنا غييير»

«قهوتنا غييير»
23 نوفمبر 2010 22:59
سلامة: بلاج الوالدة.. ليش مضايجة؟ فطوم: يدتج.. الحريم الي مثلها يدورون السجادة والسبحة.. وهي جالبة البيت ديوانية. سلامة: حرام أمايه.. يدتي ماتودر فرض ولا نافلة ماشاء الله عليها فطوم: وما تترك مباراة بعد، ولا فعالية في البلاد إلا وتشارك بها. سلامة: يدوه قلبها أخضر حي.. تحب الوناسة. فطوم: صح صح.. وأنا أحب النكد؟! (تدخل أم صويلح وتشارك في الحديث) أم صويلح: زين يوم اعترفتي أنج تحبين النكد. ما عليه يا فطوم.. باجر بتتغيرين.. بس ما عرف الساعة كم! فطوم: ماشاء الله.. متفيجه وايد.. ناشة ولج بارض للسوالف..هذا وانتم متعادلين.. عيل لو فايزين شو بتسويين؟ أم صويلح:حبيبتي هايول الأسود.. ونحن السباع.. وبعدين زين اننا تعادلنا عن العين.. الصراحة أخاف ننحسد. كفاية الأولمبي في النهائي. فطوم: أوووونكم؟ سلامة: الوالدة الله يهداج، يعني ما تشوفين يدوه مستانسة،، لا تضايجينها. أم صويلح: ما تروم يا بنيتي،، ما تروم، تبغينها تنفجر؟ فطوم: عشو ياحسرة انفجر،، انتي عيوز ما وراج شغل، تلاحقين هالمناسبات وتحتشرين وتحشرينا وياج. أم صويلح: وإش له تحتشرين ياعمري.. انتي ريحي عمرج. فطوم: كيف ما أحتشر وبيتي مستوي ديوانية حق حريم الفريج.. لا.. هذا غير السهرة لمتابعة تحليل المباريات. فطوم: قلنا بيلغون البطولة هالسنة ونفتك.. أم صويلح: تفكفكت ضلوعج قولي أمييين.. حاسدتنا على هالفرحة؟! (تدخل بي بي) بي بي: ماما.. أم عبدالله يجي. فطوم: وليش اليوم بعد.. مو اليوم استراحة.. وماشي مباريات. أم صويلح: ماشاالله.. وحافظه جدول المباريات بعد! فطوم: شنسوي.. مجبر أخاك لا بطل.. مولازم أعرف شكل تحركاتج خلال هالفترة. (تدخل أم عبدالله في هذه اللحظة ومعها دلة ومحرارة) أم صويلح: هلا والله.. هلا وغلا.. اشحالج الغالية.. عساج بخير! أم عبدالله: مرحبا بك.. انتي كيفش، يعني اذا ما سألناش، انتي ما تسأليش؟ أم صويلح: الله يهداج أم عبدالله.. وين يمديني اسأل عنج؟ امس متعشيين سوا. أم عبدالله: طيب طيب.. جبت لك قهوة ومطبق. أم صويلح: جيه.. ماعندنا قهوة.. وبعدين قهوتج خفيفة.. ما تيب راسي. أم عبدالله: ايش بتسوي لما تجي عدن.. هناك القهوة غييير. أم صويلح: بخبرج من أحين، عسب عقب لا تحشريني.. اذا وصلتو للنهائي بيي.. بس انتي عاد اسكتي ولا تخبرين الفريج، لو سمعتج النحيسة فطوم، بتخرب البطولة بكبرها. أم عبدالله: فال الله ولا فالش، لا تقوليش كدا.. نحن ما صدقنا ضبطط الأمور. أم صويلح: وشو يايبه بهالمحرار؟ أم عبدالله: مقصقص. أم صويلح: منو قص عليج. أم عبدالله: أيش هادا!.. يعني مكلتيهوش في بيتي من قبل؟ أم صويلح: أسلوف.. أسووولف وياج.. خلي روحج رياضية.
جميع الحقوق محفوظة لمركز الاتحاد للأخبار 2024©