• الأحد 10 شوال 1439هـ - 24 يونيو 2018م

كلام ميمع

لا جديد

حجم الخط |


تاريخ النشر: الخميس 01 فبراير 2018

الكابتن capitano.uae@gmail.com

ابتعدنا عنكم شويه بس ما أعتقد تغير شي وايد، نفس الهموم ونفس الوضع والشارع الرياضي في نفس الدوامه.

دورينا لا جديد ولا تغير فيه شي.. المنافسين الثلاثة هم نفسهم ولو انه ونسونا بتبادل الكراسي بكل هدوء بس بعدك تحس كل واحد فيهم مستحي يتصدر ولا خايف من الحسد لو انفرد بروحه، أما الفرق الباقية مريحه خاصة انهم يدرون ان السنة الياية بتزيد عدد الفرق، ولا عليهم من شي عدا صراحة نادي عجمان اللي شاد حيله والرمادي يقول نحن هنا بعيد عن الحشره والرمسه اللي بليا فايده.

الجزيرة العالمي يمكن الوضع الاستثنائي الوحيد اللي ماتعرف شو يبغي، ولا ينلامون ترى طاف عليهم موسم خيالي ومحتاجين ترتيب أوراق من أول ويديد.

ثبت انه النصر بعده يباله وايد لو ناوي عالدوري.. السنة اليايه والعوق في بطونهم مب في الملعب لانه مب اي لاعب لو لبسته فانيله زرقاء يستوي لعيب!، صار لك سنين وانته تعتقد إذا دفعت ويبت لعيبه من أنديه ثانية معناه انته اشتغلت زين وسويت اللي عليك، وتروح تتعاقد مع أجانب اقدر مب استثنائيين وتقتنع برأي محلل يقولك زين سويت انه يبت لعيبه متأقلمين في دورينا ويطلعون تفاقه برزه ولا يفورون دله.

وفوق هذا كله تروح تتعاقد مع مدرب متقاعد في ايطاليا وتباه يشتغل وياك ويقولك بتفهمني بعد ثلاث سنين!، ذكرني بمدرب منتخبنا اللي يبا يشتغل ويقول اصبروا بتفهمون خطتي في كاس آسيا وأنا أقولكم اي ايطالي بيقولكم هالرمسه اغسلوا ايدكم منه خاصة اذا كان من الشواب والمتقاعدين بدون شغل.

زين سوا النصر انه تلاحق عمره مب حق هالموسم حق المواسم اليايه وغير المدرب ورد الصربي اللي يعرفه، بس شرط دوروا لكم حد اييب لكم أجانب لأن بصراحه وبدون مجاملة أجانبكم ما يودون، وما أبغي أقول انكم في السنين اللي طافت ما تعرفون تختارون ولا تغترون بلجنة فنية أعضاءها محللين في التلفزيون يناقزون من قناة لقناة ولا يتعبون عمارهم في متابعة لعيبة أوروبا ولا أفريقيا عالأقل.

من الأشياء اللي ما تغيرت طبعا اتحادنا اللي شكله مطنش مب لانه قاصد بس مايعرف هذا أكثر ماعنده، وعلى قول ربعنا في مصر (حافظ ومش فاهم).

     
 

لا يوجد تعليق لهذا المقال

الإسم
البريد الإلكتروني
عنوان التعليق

التعليق
image  
أدخل النص هنا