سبيجه: بسج خلاص.. فرفرتي راسي.. من قناة لقناة.. خيييبه.. بسج ملاحقه لهالمنتخب.. خلاااص.. قري.
أم صويلح: شسوي يخويتي.. مب قادرة أيلس.. مب قادره.. ابغي ارد الامارات.. موب شي جييه.!! أبغي افرح ويا عيالي وجاراتي.
سبيجه: أفااا.. يعني أنا موب ماليه عينج.. أمس طوول الليل وياج في مسيرات وحشرة للصبح.. وبعد موب فرحانه ويانا. عنبو البحرين بكبرها إستوت الإمارات.
أم صويلح: والله ما قصرتو.. وفرحتكم على الرأس والعين.. لكن كيف تبيني أيلس هني والدنيا والفرح كله هناك.
سبيجه: ودري عنج هالحجي.. بوديج سوق القيصرية.. اييب لج ديرم.
أم صويلح: وييي.. علطاري الديرم.. ماشي وقت.. سيري إنتي يبي لي.. وكثري منه... أبغيها صوغه لربيعاتي.
سبيجه: عنبو سيارتكم ما فيها مكان.. وين يتحَملين هذا كله؟!. ماخليتي حلوى ولا بزار ولا متاي.. بسج.
أم مصويلح: يا سبيجووه.. الكل هناك يتريوني ويتريون الصوغة.. وصوغة البحرين غير.
سبيجه: وأي غييير!! وعقب ما خذيتو الكاس.. ما بيرضون ربيعاتج بأي شي.. وخصووووصا أم عبدالله.
أم صويلح: فديتها أم عبدالله. اشكثر متولهَة عليها. أبغي لها صوغه خاصة.
سبيجه: يبي لها لولو.. إنتي تعرفين أن اللولو البحريني.. لونه وبريقه ماله مثيل.
أم صويلح: هي صدق.. ليش هو بالذات غير.
سبيجه: تعرفين لؤلؤ البحرين دون عن غيره يتكون عند التقاء المياه العذبة بالمياه المالحة.
أم صويلح: صدق.. يعني أكيد موب صناعي.
سبيجه: اللولو الصناعي ممنوع بيعه في البحرين.. ويوم تشترينه لااازم يعطوج شهادة أنه أصلي.
أم صويلح: ما شاء الله.. صدق البحرين.. بلد الأصل والأصايل.
سبيجه: الزود كله عندكم.. ربي يحفظ بلادنا ويجمع شملنا ويجعل الفرح دوووووم من نصيبنا!
أم صويلح: آآآآآآآآآمين
عدد اليوم
