فلسفة ولا معاياة البيضة والدياية قديمة جداً ودايماً هيه أفضل وسيلة تبا تعايي بها حد، ولا تبا تورط فيها شباب تبا تضحك عليهم وتخليهم يطاحنون وانته تضحك.
أكيد كلكم تعرفون هالفلسفة وفي كرتنا البيضة والديايه حاضرة دايماً، تباها في التلفزيون حاضرة بين المحللين وسوالفهم تباها في برامج السهره حاضرة وتحس انه شي إجباري أي واحد يجابل الثاني عالطاولة لازم يعاييه ويناحسه في أي راي يقوله، ولو غير فلان رايه في حلقة بتحصل علان معاكسنه ولو على باطل.
البيضة والديايه تباها في سوالف محللي الحكام ولا حتى لجنتهم موجودة هذا يقول النية موجودة وتجلب القناة تسمع أن النية مب موجودة!! ارسولكم على بر ترى لعوزتونا ولو حد يبا يسوي لكم فيديو حق تفسيراتكم يمكن تتفاجؤن وما تعرفون عماركم من كثر ما تختلفون وتغيرون كلامكم بين مباراة ومباراة ولا فريق وفريق.
آخر تطبيق لفلسفة البيضة والدياية هي سالفة ليما وربعه في فيديو البطاريق اللي انتشر بسب مباراة داحس والغبراء !.. أول شي خل نتفق على أن البطريق طير حبوب ويونس والكل يحبه واكثركم يروح الإمارات مول ويتصور وياه سلفي وهو يضحك أكثر من عياله.
عموما نرجع حق فلسفة البيضة والديايه اللي فتحت لها القنوات استوديوهات مالها أول ولا آخر، الفيديو غلط ولا مب غلط؟ اللعيبه ارتكبوا سوء سلوك ولا مافيها شي؟ النصر غلط انه اشتكى ولا ماغلط؟ الوصل غلط انه ما أدب لعيبته ولا ماغلط؟ هذي قضية رياضية ولا قضية قانونية مفروض تروح الشرطة!
المهم المعاياه تمت تدور بين الجماهير ومرة وحدة تفاجأنا انه وصلت لجان الاتحاد !
لجنة الانظباط تقول يتوقفون ولجنة الاستئناف تقول لا ما ترومون توقفونهم!!
وضاعوا الناس من صح ومن غلط وآخرتها رأي قانوني في التلفزيون يقول النصر موقفه صح والاستئناف غلط، ويرد عليه رأي ثاني بالتلفون في نفس الحلقة ويقوله الاستئناف صح وضيعونا بين البيضة رقم 15 والدياية رقم 16 وانه العقوبة مثل الكل يعرف انه مافيها استئناف!
في ذمكتكم هذي سالفة! مب مهم غلطانين اللعيبة ولا مب غلطانين المهم انتوا راضين قوانين الاتحاد تستمر بهالطريقة، ما كفاكم قضية خميس خذتوا فيها شهور وانتوا تتعايون وقضية فاندرلي نفس الشي شهور حق سالفة واضحة وضوح الشمس بس الظاهر قوانينيا في الاتحاد اللي كاتبنها ويشتغل فيها من فلاسفة البيضة والدياية.
نتريا ونشوف من بيطلع صح مع اني خلاص اقتنعت انه كلهم غلط.
عدد اليوم
