الحبسي وعجب

''بي بي'': كله تماما·· قهوة سمبوسة، بلاليط، لقيمات، شاي حليب، خبز خمير مال أم عبدالله، وشيز كيك··· أم صويلح: شو بعد هذا ششييس كيك؟! ''بي بي'': هذا أوردر مال ''سلامة''· أم صويلح: ومنو قال أن سلامة بتطالع المباراة ويانا؟ سلامة: أفا يدوو·· يعني ما تبيني! أم صويلح: مب جي السالفة، لكن كلنا حريم·· أمون وأمول وأم عبدالله، شو بتسوين بيننا؟ سلامة: وليش يعني!! البنات ما يطالعون المباريات؟ أم صويلح: ملسونة مثل أمج، منو بيقدر عليج؟! سلامة: لا يدوو·· أمي تقول أني مثلج· أم صويلح: مالت عليج وعلى أمج· سلامة: زين زن يدوو·· أنتي بس خبريني على أي قناة بتشوفين مباراة عمان والكويت؟ أم صويلح: شو هالسؤال الغبي؟! أكيد بشوفها على الفضائية العمانية· (الجميع ملتف حول المائدة خلال الشوط الثاني) أمولة: شوها كله يا أم صويلح، هم يركضون في الملعب ونحن هني نزج! أمونة: ليش ما تقولين نفسج مسدودة يوم ان المنتخب الكويتي ما ياب جول لحين· أم صويلح: ما ضن نفسها مسدودة، ما تشوفينها تشهق كل ما الكويتي ''أحمد عجب'' ياخذ الكورة· أمولة: ما تشوفين عمرج شو تسوين يوم الحبسي يزخ الرميات·· خلني ساكتة أحسن! وبعدين توه وقت عسدة النفس·· توه مخلص الشوط الأول· أم عبدالله: أكيد ''زلوخ'' زعلانة·· ما أشوفها دقت عليش يا أم صويلح! أم صويلح: صدقج والله، الحرمة من الظهر في الاستاد، وكل شوي تتصل وتسمعني الحشرة الي عندها، وآخر تلفون ياني منها وهي تنشد مع السلام السلطاني· أم عبدالله: المفروض كانت شافت المباراة من بيتهم، شوفي الكاميرات كيف تغطي الملعب تماما، 22 كاميرا في الملعب، يعني كل حاجة واضحة في التلفزيون· ام صويلح: أهاااا·· يعني اليمن يوم بتلعب ما بتسيرين الملعب تطالعين المباراة؟! أم عبدالله: أنا غير، بعدني صغيرة، ونظري تمام· أمونة: بدينا الخراط·· أقولج أم صويلح·· دقي على ''زلوخ''·· خلنا نشوف شوو السالفة·· وأقولج بعد·· حطي التليفون على السبيكر· بنت المنهالي alsaadalmenhaly@hotmal.com