2 أغسطس 2008 22:36
هلا وغلا·· أول شي أحب أشكر من راسلني، وتحمدولي بالسلامة عقب طيحتي؛ وأطلب منهم السموحة·
الشي الثاني، حبيت أدلي بدلوي بخصوص الرمسة إلي استوت حول موضوع الشاطي الجديد في أبوظبي، وأقول أني استأنست وايد به، وخصوصا عقب ما فرضوا رسوم على الناس، وكان ودي يكون أكثر عن جي بعد، لأنه ملينا صدق من عيون المتطفلين الي ما لهم شغلة غير أذية الناس ومضايقتهم·
صدق أني ما سرت لحين،، لكن ''أمون'' و''أمولة'' ساروا قبل فرض الرسوم، وما استانسوا، وما كنت ناوية اسر، لكن أكيد الحين الأمر اتغير احين شوي·· وأقول شوي، لأن بعده الشاطيء مختلط؛ قبل كنا نسير الكاسر، وين شاطي النساء، مكان حلو وخاص ومميز، صدق بحره صغير لكن ساتر، الحين الله يسلمكم ما عاد لنا غير هالمكان المختلط، وين نقدر نسبح·
أكيد بتقولون وين بعد تعرفين تسبحين يا العجوز؟! لكن والله - ومالكم علي يمين- أني اعرف اسبح،، وشاطرة بعد، الله يرحم أبوي، علمني، ونحن أهل البحر ماحد في عيالنا وبناتنا ما يعرف يسبح؛ والحين يوم بغينا نعلم بناتنا ما قدرنا·
مساكين هالحريم والله، وين ما ندقها تطلع عوجة· مايستوي نستسلم للسمنة، وأمراض السكر والضغط منتشرة بيننا، ورغم جي، ماشي مكان نقدر نترفه فيه ونتريض بحريتنا؛ وإذا بغينا نستانس، لازم نكون مقيدات بالعبي والشيل والبراقع؛ بس تصدقون بتكون أشكالنا عجب عجاب ونحن نازلين البحر بعبينا وبراقعنا،، بيتحرونا الأجانب كائنات فضائية·
ام صويلح
عدد اليوم
