طبايع التيس !!

سلامة: يدووه الله يخليج شوفيه.. تعرفين كم وصل عدد مشاهدينه على اليوتيوب؟. أم صويلح: أقول لج ما أبغيييي.. من يومي ما أداني هالسوالف.. راويني شي يضحك.. شي غريب.. لا تراويني الأشيا الماصخة. سبيجة: راويني.. أنا بشوفه. أم صويلح: أقولج سلامة.. لا تستوي حنانه.. ما بشوف شي. سلامة: يدوه مب ماصخ.. وايد يضحك. فطوم: إنتو مو تتابعين البطولة! لازم تعرفون كل إلي يستوي فيها. أم صويلح: خسي.. منو قالج هالضرابات وجلة الحيا هاي من البطولة.. ولا يخصه.. هالناس رازة ويها في البطولة. فطوم: وإنتي شو دراج إنه ضرابه!! عيل إنتي شايفته قبل.. بخبرج سلامة.. ترى يدتج تتابع استوديوهات التحليل.. أكيد شايفتنه. سبيجة: سلامة راويني. (سبيجة تشاهد الكليب) سبيجة: وراهم يتضاربون.. عيب ما يصير.. أدناة الدون موب جدام الناس. أم صويلح: عقولتج بغيناها طرب صارت نشب. إلي مسويين هالبرامج أصلا يبونها نشب وحريجة بعد.. ولا يخصهم بالرياضة. فطوم: البطولة بكبرها حريجة.. إنتم الي ما عندكم سالفة.. أونه خليجي المحبة والإخاء؟!! سبيجة: المحبة والإخاء عصب عنج.. صج يوم قالو عنج معنطزة. أم صويلح: أنا ما قلت معنطزة. سبيجة: قلتي عنها عنيدة ومناحسه.. يعني معنطزة. أم صويلح: شفتي.. الحرمة توه تشوفج.. وعرفتج.. ما شاء الله. شخصيتج تفرض وجودها. (سلامة تغير الموضوع) سلامة: ياسلام.. شو هالحلوى اللذيذة؟ أم صويلح: هاي يايبتها سبيكة.. حلوى شويطر.. ذوقي المتاي بيعيبج. (تخرج فطوم وهي غاضبة) سبيجة: أكيد طنقرت! والله ما يبين عليها.. يوم تقولين عنها.. تحريتها متيينة.. هاي نتفة! أم صويلح: نتفة!! سبيجة: إيي.. نتفة يعني ضعيفة وقصيرة. أم صويلح: لو تعرفين شو مسويه فيني هالنتفه.. في كل ترز ويها.. ولا تعرف شي. سبيجة: ومصومعه بععععد!! هاي مثل برامج النشب في التلفزيون.. عادي.. رزة الفيس من طبايع التيس.