الله يباركلي فيكم، الله يسلمكم·· هي·· هي، هاذي أنا، ما غيري، أنا ''أم صويلح''·
أدري فيكم، كلكم بتسألون، شو يايبنج على النت، عاد أنا قلت أتطوَّر وأدش العالم الافتراضي اللي يقولون عنه، وأثبت للجميع وخاصة فطوم، إن ما في شي ما أقدر عليه·
ما دريتو، شو سوَّت يوم شريت الكمبتوتر!! اعتفست عفاااس·· وسوَّت يوله، وضاربت صويلح، وقالت له: أمك اتخبَّلت، تقلد ''سلامة''، إنزين، هاذيج، طالبينه منها في الجامعة، أمك منو طالبنّه منها؟ خس الله عقلها، ماحد خبلة غيرها·· مادري ولدي ليش متحملنها لحين!، أصلاً بروحها ''سلامة'' جزاها الله ألف خير شجعتني، يوم درت أنه عندي أشياء وايد ابغي أقولها، بس مب لاقية فرصة·· ولا مكان· قالت لي تقدرين تسوين موقع على النت، تقولين فيه اللي في خاطرك، ويقروه الناس·· ويردون عليه بعد·
قررت، وسويت على اسمي، ''مدونة أم صويلح''· قررت بعد، أني ما بَخِشْ شيْ عنكم، كل شيْ بقوله: سخافات ''فطوم'' زوجة ولدي، وحركات ''بي بي'' بشكارتي، ومؤامرات ''سلامة'' حفيدتي، وخرابيط ''صويلح'' ولدي، وسوالف ربيعاتي وجاراتي، كل شي بقوله، ما بَخِشْ شيْ·
مب قصدي أفضحهم، أعوذ بالله، كل السالفة أني بقول رأيي في اللي يسوونه، بس على المدونة·· شاسوي؟ إذا قلت في وجههم، يزعلوون عليْ، ما عاد حد يتحمل الصراحة هالزمن· وأنا بعد·· ما أتحمل حد يصك حلجي·· وأنتم بعد بتقولون رأيكم، بنشارك بعض في حياتنا، ما حد يعيش بروحه·
بصراحة، تعبت، كلهم مشغولين عني، اللي في دراستها، واللي في شغله، ما حد متفيِّجلي، إلا فطوم، وهاي الله يسلمكم، بس متخصصة في النقارة، تعبت منها، مليت، قررت أدور لي رفجة جديدة في العالم الافتراضي،، خلااااااص،، حان وقت الانطلاق·
عدد اليوم
