مدونة أم صويلح بي بي والمهر

جتني أربع إيملات تسألني شو عطتج ''فطوم'' في عيد الأم، الظاهر مب كفاية أني قلت ذهب؛ شو هاللقافة؟ مستويين أخس عن ''بي بي''، حياتها تفتح الأكياس وتشوف كل شي، ما تتحمل يدش بيتنا كيس بدون ما تتعبث وتشوف شو فيه! وعادي عندها، تقول: ''من وين يجيبي هذا؟''، أو ''هذا بكم خذتيه؟''، أو تعلق، '' قصوا عليج ماما''·· مو أقول لكم·· لقافة عفانا الله· بس تعرفون أشكثر أحب هالبشكارة؟! ما بتصدقون، تراها معاي من ثمان سنوات، استوت مثل بنتي، يتني وهي صغيرة، وأحين استوت حرمة وشاطرة وتسوي كل طباخنا، وأحسن عن ''أمون'' بعد؛ عرفت طباعها، وعرفت طباعي، وأشاورها في خرابيط ''صويلح''، وإتهون علي نحاسة ''فطوم''، لكن من أسبوع يالها تلفون من أهلها، يخبرونها إنه يالها معرس، يشبه ممثل هندي، هي تحبه وايد، وعاد هني تخبلت، وشلت الدنيا، وتريد تسافر، لكن مشكلتها إن المعرس طالب مهر عود، ما تقدر تدبره· مسكينة ''بي بي''·· من وين لها؟،، من يت عندي وكله تطرش حق أمها البيزات، مرة يصلحون بيتهم، ومرة يشترون أرض، ومرة يبنونها، ومرة أختها بتعرس، ومرة مدري شو، المهم ما عندها شي، والحين يوم جاها هالممثل، اقصد المعرس اللي يشبه الممثل، ما عندها تدفع له مهر· حسيت فيها تبغيني أعطيها، لكنها تدري عدل شو رأيي في موضوع مهر الرياييل هذا؛ أونة،، بعد هاللي ناقص تدفع حق المعرس عشان ياخذها·· الله ياخذ روحه· عيل يوم بياخذ عليها وحدة، بيعطيها رضوة مثل عندنا؟! ع طاري الرضوة، الأسبوع اللي طاف، واحد ربيع المرحوم ''أبو صويلح'' عرس على بنت عمرها 22 سنة، تصدقون، يعني كبر حفيدته، ودفع حق زوجته الجديمة رضوة، يقولون 100 ألف، سبحان الله، لو أنا مكان هالحرمة، بعطيه 200 ألف بس عشان أفتك من وجهه؛ ناس تكبر، وتعقل، وناس تكبر وتتخبل· ام صويلح