قضايا شعبية

حزام أسود: بعض الناس عندها حزام أسود في «قوة الويه». الدور: فايدة الأخت اللي مب معرسه .. حضانة دور ما داير السنة. صناعة تقليد: كل يوم يزيد عدد الناس اللي أكتشف إنهم «صنع في الصين». احتياجات أساسية: تدخل الجمعية بتشتري معجون .. تطلع بـ 3 أكياس وقوطي البيبسي في إيدك. ساعات الصباح: تتمشى في السوق الصبح تتلاقى مع فئتين من الناس: (1) فئة المتقاعدين (2) فئة الشاردين من الدوام بالدسة. تنظيف إلزامي: الواحد يوم ينظف حجرته: 1% ينظف.. 24% يتحرطم.. 75% يلعب بأشياء حصلها وناسنها من زمان. تساؤل غذائي: جد مر عليك يوم نسيت تأكل فيه؟؟ ولا أنا!! صراع يومي: يومي عبارة عن صراع داخلي بين: حبي للأكل وهمي إني ما أمتن!! الناس أجناس: البعض وجوده في حياتك كالهدية .. والبعض وجوده كالصنم «بليا حاسيه». تعداد سكاني: تبغي تتطمن على نسبة المواطنين في البلاد .. سير مطعم يديد توه فاتح! سبب ونتيجة: دائما ما يتبع التصرفات الخاطئة عبارة «محد قالك»! نوبات الغضب: درجات الغضب تتفاوت بحسب الزياريين الي تطلع من الراس إقناع النفس: «يوم واحد ما بيأثر» جملة جلبت الرجيم وخربت الميزان وطلعت كروش. البيوت أسرار: ياما أسرار طلعت مع إنه المفروض «هالكلام بيني وبينك»! حقيقة وواقع: شخصيتي الحقيقية تحددها «نسبة الميانة بيني وبينك»! حق المعرفة: شوفولنا حل مع الناس اللي انعرفهم وايسوون عمارهم ما انعرفهم! معادلة صعبة: البعض مثل الشعرة اللي تدخل في الكتاب واتجلد عليها.. صعب تتفجج منهم! انطباع عام: «عطيتها بنظرة من فوق لين تحت» الوحدة إذا شافت وحدة في السوق وما يازتلها.